|
1. Ich ben ne Höhenberger Jung
un schon jet bei Jore.
Wenn ich hück der Höhenberg sin,
kumme mir die Trone.
Un ich denk en mingem Senn
bei nem Kölsch und Klore:
Wo sin die schöne Johre hin,
wie se fröher wore?
2. Op der Frankfurter Stroß, do fuhr
dat ahle Waggelbähnche
vun Opladen üvver der Wiener Platz
bes zum Gronau-Sälche.
Un wenn Sonndags meddags dann
der VFR dät spille,
wor die Bahn jerammelt voll;
se dät bal üvverquille.
3. Eck' Höhenberger - Olpener Stroß
do stund die Hartkopps Villa,
un hingendurch, en der Kruckfabrik,
do wunte dat Maiers Billa.
Wo jetzt der Kaisers Kaffee es,
do wor dat Kleffels Büdche;
dat weiß ich noch janz jenau:
die kräten Samstags Brüdcher.
4. Un uns ahl Katharinenburg,
die wor en Augenweide.
Un su mancher Kalker dät
uns doröm beneide.
Dät des Sonndags meddags dann
die Musik opspille,
jo, dann soh mer Alt und Jung
et Danzbein kräftig schwinge.
5. Friedags kom met freschem Fesch
der Hollandria zu laufe,
un die ahl Frau Offermann
dät Deckers Milch verkaufe.
Un der decke Barth'se Franz
ref: "Hat ehr Klütte nüdig?!"
weil hä noch jet om Wage hat. –
Mensch, wor dat jemütlich!
|
|
6. Am Sonndagmorje feierlich
vier Jlocke däten klinge,
un vun der Empore dät
et Weber's Käthe singe.
Wor die Prädig vill zo lang
und Arnold Pütz am schlofe,
wod hä vom Schweizer Birschbach
hösch widder wachjerofe.
7. Wenn dann der September kom,
soh mer Schötze laufe.
Wie ich mich entsinne kann,
wor dat ne janze Haufe.
Beim Äschplatz en der Adalbertstroß
stunte Bude un Karusselle,
un der ahle Höhenberg
roch no Frikadelle.
8. Dät die Fronleichnamsprozession
üvver der Höhenberg trecke:
Fijürche ün Altärche soh
mer do an alle Ecke.
Un dät der ahle Pelzer dann
der Brodermeisterstock schwinge:
Die Jungfrauen-Kongregation
fing kräftig an zo singe.
9. Eins, lev Lückcher, sag ich üch:
Lot der Kopp nit hange,
es die schöne ahle Zick
och wie em Floch verjange!
Setze mir dann op ner Bank
un han ald leich der Zidder,
denke mir daran, wat fröher wor –
jo, dat kütt nie mih widder.
|
